一哥點故 (Closed)

有日坐巴士經過摩利臣山道，見到呢度有間一哥點故，係點心專門店，於是上網睇下評語，見到都非常多好評，所以週末就帶屋企人來食餐晚飯。 一行四人坐卡位，都算舒適。我覺得這裡的燉湯係必點，每日有三款選擇，我哋就叫咗一盅姬松茸菌燉雞試下。味道好驚喜，湯頭十分濃郁，啖啖都係精華，咁好味，下次嚟一定要一人一盅。餐牌有好多創意嘅點心，例如龍蝦汁鮮竹卷，紫薯流心煎堆仔，都係傳統酒樓食唔到嘅。我鍾意呢度嘅點心，畀我一種新鮮嘅感覺，冇傳統酒樓咁悶。除咗飲茶，仲可以飲豆漿，羅漢果水等。最後嘅甜品都好多款式，揀咗草莓桂花糕同埋太陽蛋奶凍。草莓桂花糕底下係士多啤梨同淡淡嘅椰汁味，面頭就係平時食嘅桂花糕，幾特別。而奶凍賣相好似太陽蛋咁，小朋友一定鍾意。