燒房焗 (Moved) New Location

幾個月前睇到某雜誌介紹串燒，膽粗粗去試試（實在喺對香港串燒已經無乜信心），點知又有啲喜出望外！早前唔見咗一排，最近睇到有新動向，即刻又走去試吓。水準依舊，但就多咗好多嘢食，新嘢主要喺是日海鮮同埋冷盤。其實哩間嘢都可謂「唔知就比佢嚇死，知就爽死」，皆因佢日頭本來喺茶餐廳，入夜後先喺條好唏嚧嘅街開門做生意。可能因為咁，所以就有好多好平嘅正嘢食～小妹主攻，首選鵝肝！除咗因為本身喺「膽固醇」人之外，當然喺因為抵啦！＄68 食到出面舊幾水嘅鵝肝喎！！除咗鵝肝，仲有我至愛嘅羊！紐西蘭羊架！medium rare 但啲肥羔燒到脆，正！喺第二度試過黑豚腩卷荔枝、煙肉卷車厘茄之類嘅嘢，但都喺最鍾意哩個配搭﹣﹣黑豚腩唔會好似煙肉咁咸，肥羔唔會好多，燒過後好香口但唔會太油，加埋好多汁嘅荷蘭車厘茄。簡值喺絕配！但記得趁熱食，凍咗個茄會縮，啲汁會流走晒。金菇，我本來麻麻地，成日覺得佢有陣唔知咩怪味，而一般食到嘅金菇牛肉卷唔知喺咪太多金菇而肥肉又薄，所以硬喺覺得有啲燒唔透嘅感覺。但今次一試，安格斯牛肉包住少少金菇，又好正喎！最主要當然喺個牛香，配返少少菇，唔膩口。從無喺度食過雞軟骨，因為本來就對雞軟骨就無乜冀望。