食上海菜當然要食小籠包，蟹粉小籠包雖然蟹粉唔多，但非常多湯汁，皮唔算厚，算係唔錯。
五小碟
水晶肉幾清新唔油膩，素鵝幾入味。雞絲粉皮同糖醋小排比較普通，烤夫好脆口有驚喜到。
賽螃蟹炒得非常滑，冇過老，清淡又嫩口，而且大大份幾抵食。
筆者好鍾意食麵，幾飽都想叫個炒麵食。老上海炒麵雖然冇咩特別餸，但勝在夠鍋氣，唔會痴埋一齊，又夠味，佢個咸度係筆者喜歡嘅程度。
酸梅湯非常好味，無渣而且好好入口，夠冰涼。豆漿比較普通。酸辣湯唔太辣，冬天的話暖胃應該唔錯。
炸銀絲卷又係另一種驚喜，最外層炸到鬆脆，但內層仲有銀絲卷嘅軟屬，點煉奶食真係一流。
高力豆沙內涵好豐富，咬一啖已經係滿滿嘅豆沙。
晚餐黎講夏麵館真係十分實惠，之後再想食中菜真係可以回訪！
