樂斯餐廳 (Closed)

同事聖誕放大假，放假前諗住同佢去食某間餐廳，點知無開門，附近又間間等位喎，lunch時間緊迫，近近地去樂斯啦。講真佢又唔係差嘅，一般茶記囉，撘枱完對面走左，有人黎又話要讓張完整枱出黎，你搬到去另一張枱又有人無啦啦調位霸左張枱，樓面唔會理之餘仲串串貢無位你返出門口等下啦，大佬呀，我落左單㗎。終於有枱啦，但你個餐已經放左好耐，無乜食欲了。唔係同事話算真係想走左佢，調黎調去仲無啖好食。同事叫嘅鹹雞飯，雞無雞味明顯係雪雞，正常嘅，飯放涼左，旁邊有碟蠔油汁嘅物體，鹹鹹甜甜咁，我估係點雞醬，但個人黎講寧願要薑蔥蓉。自己叫左叉燒香蔥煎蛋飯，我呢碟坐低先黎所以仲熱，蛋煎得香口，蔥下得多，加埋甜豉油其實幾好味，唯獨係咁大塊蛋入面只有兩舊叉燒，我本來諗住佢係切成叉燒粒先煎，諗多左。熱奶茶正正常常幾好飲，個餐仲有一碗例湯送，無影相，是日係紅青蘿蔔豬骨湯，淡味啲，但至少唔係味精湯。五十幾蚊個餐唔好期望太多，食飽好走啦。