天海家草庵 (Closed)

食過中環既天海，回味無窮，所以知道北角開咗分店，仲行平價路線就即刻嚟試。但係感覺、環境同食物都同中環間天海無得比。北角分店喺裝修咗既和富商場入面，比中環分店大。因為喺商場入面同行平價路線，所以都預咗係快餐既裝修同感覺。一開始午餐時段就到咗，但經理既態度認真麻麻，茶餐廳侍應既感覺。海鮮天丼配迷你烏冬📌$118丼飯配海鮮天婦羅仲有個燒汁，拌飯幾好味。天婦羅有蝦、帆立貝、魷魚、魚、蟹棒、秋葵。最好食係個炸蝦，跟餐仲可以揀配沙律或迷你烏冬。我地揀咗烏冬，份量都好夠，烏冬係幼烏冬，質地煙韌。壽喜燒&天婦羅幕之內便當📌$128便當有天婦羅、牛肉同燒三文魚。天婦羅質素正常，好彩都夠熱。肥牛好肥，仲肥過吉野家肥牛。三文魚燒到好乾，過熟，有啲浪費咗條三文魚既感覺。北角分店做緊promotion，Like 社交平台page送汔水，check in 仲有一隻炸蝦送，都幾抵。整體嚟講，可能因為食過中環天海，所以對北角分店都有少少失望。如果可以揀，寧願比多少少錢食中環既Lunch Set，成餐飯既感覺同食物都更好。