我地揸車黎, 一早問左酒店, 消費夠$500就可以免3個小時car park, 之後$50一個鐘~~~ 早在兩星期前已訂位了~ 亦都訂晒7款卡通o既點心啦~~
打電話黎o既時候已經講左要坐窗口位, 不過電話中職員話只會盡量安排, 黎到個陣職員帶位時, 就真係預備左窗口大卡位比我地, 實在太開心啦, 坐得非常舒服~ (唔好意思, 冇影到個坐位!!><”) 但我有影到坐位望出外面o既景, 望住個綠草迷宮, 對出就係個海啦~~
職員o既服務;態度都好好呀, 一黎到就叫左壺菊潽, 好香菊花味呀, good!! Menu其實好多野揀, 花多眼亂, 樣樣都想試呢~~ 睇左一大輪就叫左下面o既野食啦~~~
1) 米奇煎薄餅
2) 米奇鴛鴦糕
3) DUFFY 紅豆蓉包
4) 雞丁蓮蓉包
5) 大眼雞包仔
6) 蠔汁叉燒豬仔包
7) 綠色小人菜肉包
8) 荔蓉天鵝酥
9) 珍寶海鮮春卷
10) 原隻鮑魚燒賣
11) 舞茸蟹肉小籠包
12) 菜苗餃
13) XO醬雙菌蝦仁炒腸粉
14) 晶荷軒炒飯
個人認為好多野都好好味, 卡通點心真係可愛唔想食呀~~ 個煎薄餅好煙un好好味, 鴛鴦糕都要讚一下, 佢係用蘿蔔糕同芋頭糕底面夾埋一齊咁煎, 一口兩種糕食落去又真係幾好味, 兩個味道好夾!!
卡通造型o既紅豆蓉包, 蓮蓉包, 雞包仔, 叉燒豬仔包同菜肉包就普通啦, 唔係話特別好食, 因為都係食個造型多d~!
2
想講個海鮮春卷! 好味!! 而且真係好珍寶呀, 黎到個陣我先知原來係珍寶版!! 原隻鮑魚燒賣就係攞黎孝敬呀爸呀媽啦, 鮑魚都ok大隻架wor, 佢地都話幾好味~ 仲有個炒腸粉, 以為都係hea炒個隻啦, 點知黎到成碟餸咁大碟架, 而且仲好好味, 又有大大隻蝦同其他料一齊炒, 真係唔錯~
最終我都係怕唔夠食, 所以先會叫左個晶荷軒炒飯, 以為會好有特色啦, 點知竟然係一個普通到不能再普通o既西炒飯…….呢下都幾失望架, 仲要成二百蚊一個tim……..
