醉江南

Open Now

Now Closed

喺香港要食上海咸肉唔難，但要抵食就好難，兩個月前去試食過老雪園，2舊水，只係食到咸肉---絲而呢間小店只需要65蚊就食到大大塊仲要部位靚嘅咸肉炒年糕喇。睇相，色澤夠靚，雖然偏肥，但勝在夠大塊同入味。咸肉同清炒年糕真係perfect match黎。呢度炒功亦相當唔錯，有鑊氣得黎唔算多油，非常滿足。其實淨係一碟年糕都夠食，不過為咗多樣野寫，又叫多碗京式水餃，係白菜豬肉餡黎。白菜本身味道冇乜個性，只靠豬肉少少調味，加上碗湯亦冇乜味，食落稍嫌淡口。不過餃皮夠薄，肉汁算多42蚊碗絕對係中上水準喇。環境就唔算好坐，一個人食幾乎一定要搭檯。呢一次去，杯茶仲有極濃烈洗潔精味，食完想飲啖茶「浪」吓口都唔敢，扣咗啲分。間野晚市要收加一嘅，埋單120有找。中意食咸肉嘅朋友，絕對值得黎；但係中意食小籠包嘅話，建議你搭遠幾個站，食美孚新上海喇。