店內環境唔錯木系裝潢和味十足，事前預早訂枱，餐店安排了卡位大枱入座，私人空間十足坐得舒適自在。
看看餐牌大量美食照，圖文並茂非常吸引，相中食物與實際相符，同樣靚仔兼大件。
這裡還有免費日本焙茶供應，省卻另叫餐飲。食完炸豬扒喝茶解膩，焙茶是最好不過。單寧酸和咖啡因含量低，可夜晚飲用，唔怕晚飯飲完之後夜晚眼光光等天光啦。
點完美食叫左炸豬扒，趁空檔時間親自動手製作沾豬扒用的芝麻醬，個人特別鍾意這個有趣的環節。每人一碗白芝麻，用小木棒慢慢將芝麻磨碎，芝麻味慢慢散出來好香，再加入豬扒汁混埋，完美醬汁就咁完成。
脆炸軟殼蟹(一隻) $58
前菜軟殼蟹先到，蟹唔算大隻分成兩件淺嚐可以，炸粉好薄蟹炸得好脆好香口，難得味道未被炸粉掩蓋食到蟹肉味。
吉列大蝦豬扒定食 $318
主角出場無令人失望，豬扒大大塊分成六件，大蝦三隻好長好大條。金黃鬆脆的炸衣相當吸睛，蝦肉鮮甜爽口食落啖啖肉，沾少少海鹽食鮮味倍感提昇十分好味。吉列豬扒外脆肉嫩口感豐富，豬扒厚切保留到肉汁，沾上早前動手製的芝麻醬味道相當匹配惹味非常。
定食附有白飯和椰菜絲，不用加費可無限添加非常抵食。白飯用珍珠米飯粒圓潤飽滿。有機椰菜用機切絲，椰菜絲特別幼細，而且經過後期特別處理，菜絲通透食落非常爽甜。個人喜歡椰菜絲淋上酸酸甜甜的西柚汁和吉列豬扒一起食，中和口味感覺無咁油膩又好味。
麵豉湯
同樣跟定食上，湯料十足昆布豆腐蜆肉都見，湯味唔係好鹹味道不錯。
原條鰻魚飯定食 $228
烤鰻魚的確好大條望落好滿足，魚肉肥美肉質嫩滑，帶點碳香味，塗上美味的鰻魚汁，無論賣相和味道同樣出色。
最後食完還有粒粒西瓜呈上，西瓜清新味道中和返之前吉列的油膩，為美味的晚餐劃上完美的句號。
