上檯嘅水加咗薄荷同青檸，幾清新，幫助開胃，唔錯。
今次叫咗兩個假日午餐，兩份嘅主菜都係咖喱雞腿肉，前菜有巴馬臣火腿配哈密瓜、芝麻吞拿魚刺身、雞胸沙律。
食物質素方面，赤身吞拿魚刺身嘅出品唔輸同價位餐廳，算係正常出品。主菜咖喱雞腿肉方面，出品正常，不過不失。以味道計，以及喺銅鑼灣地段，路過時仲有機會再光顧。
不過，有個大問題係前菜、煮菜、飯同埋烏冬一次過上，搞到人有啲唔知點食好。特別係點咗烏冬嘅話，你會唔會先食前菜定先食烏冬呢？烏冬放太耐會軟晒，但主菜放太耐又會凍。
明白餐廳平日可能要快啲應付午餐，但我嗰日係週末，或者可以留意一下上菜次序。
咖啡方面，我叫咗黑咖啡同 Tiramisu。對於我呢個平時唔飲咖啡嘅人嚟講，黑咖啡算係易入口，唔會有難聞嘅苦澀味，甚至有啲 Nutty 嘅感覺，非常唔錯。
Tiramisu 配手指餅幾好食，
不過個人始終麻麻哋 Tiramisu，所以冇乜其他意見。總體嚟講，Mozy 嘅用餐體驗都算唔錯。如果上菜次序可以改進一下，會更加好。如果你路過附近，或係附近返工，呢度唔失為一個好選擇。
