喜來稀肉 (金巴利道)

Open Now

Now Closed

尖沙咀呢條街，一向多韓國野食，我朋友book咗呢間食韓燒，佢地之前食過話幾好食，價錢又ok,所以今次都book返呢間。入到去出奇地冇乜燒烤味，我食韓燒最怕就係大油煙，呢間抽風抽得幾好。未點餐，已經有幾碟前菜喺枱面，我覺得最出色係泡菜，都幾辣，啱晒我胃口。而爐邊有蒸蛋，味道幾好。我地叫咗2款肉同幾款韓食。喜來烤肉，上碟時卷到成朵花咁，都幾靚，原來係一片片醃咗味嘅薄牛肉，個汁幾好味，有少少甜甜地，雖然睇落唔係好肥，但都好juice。牛肋骨肉，帶有少少肥，不過燒嘅過程，大多數嘅肥油已經燒晒出黎，完全唔肥，有咬口，好重牛味。海鮮泡菜餅，橙色睇落好似好辣，不過食落唔係好辣，入面好多海鮮，有蝦有魷魚，個餅煎得好脆口，但入面又唔會好乾，幾惹味。拌冷麵，麵條勁煙韌，涷冰冰嘅冷麵，咁熱嘅天氣最啱食。紫菜飯團，勁多紫菜鋪喺飯團面頭，d紫菜好香麻油味，飯粒煙煙韌韌，勁好食。