軒尼詩冰廳 (駱克道) (Closed)

繼續留港消費，琴日去咗旺角食韓國料理，今日就同朋友嚟灣仔駱克道呢間「軒尼詩冰廳 越廚」品嚐新近推出嘅越南菜。 餐廳佈置簡約，店內環境光猛，裝修新淨，設有大量卡位同梳化座，座位闊落鬆動，坐得十分舒服。先嚟兩款越式小食，大蝦米紙卷 ($58) 同 薄切鹽燒牛肉。米紙卷一客 8 件，分量十足，外皮煙韌，內餡飽滿，有紅蘿蔔、檬粉、青瓜絲同大蝦，配自調魚露汁，非常醒胃。牛肉薄切，肉質柔軟，滑嫩多汁，甘香又有牛味，入口啖啖肉，食得好滋味。招牌火車頭 ($98)  湯底味道好香濃，鮮甜又不油膩。河粉白滑，配料有牛腩、生牛肉、牛丸同牛展。牛腩軟腍有肉味、牛肉鮮嫩不韌，而牛丸亦彈牙有咬口，貨真價實。馬拉盞炒通菜 ($72)  通菜炒得鑊氣十足，碧綠又唔會過老，帶濃郁辣椒蒜蓉香，惹味非常。最後點咗甜品同飲品，椰汁西米糕 ($32) 質感軟綿 ，椰香味好重，配上粟米粒，香甜又不膩口。咖啡紅豆冰亦唔失禮，紅豆大大粒，軟腍有咬口，加上滿滿港式咖啡香，令人回味無窮。