1
小店主打都係車仔麵，另外仲有雲吞麵價錢一樣，分細，大，同加大3個size，每個size都只係差$2，飲品$5就有杯豆漿，一枝都係$8，其他飲品就$15。
先要左杯豆漿，唔會好甜有豆味，5蚊杯而家真係無乜地方搵到，抵飲。
由於上次係另一間名店食過碗車仔麵唔夠飽，今次我試下加大碗，都係$32，自選5款餸，麵底要油麵，餸分別要左豬紅，豬皮，豬腸，紅腸同蘿蔔。
由於落單果陣唔記得主動講話要咩汁同咩辣，自動俾左個好似咖哩但超微辣既汁底俾我地，未食過既朋友如果想加辣就記得落單時講埋啦。
首先黎到個都賣相當然就係非常嗱喳啦
，好傳統既嗱喳麵，麵既份量幾多，5款餸其實都唔少，係紅腸得1塊，豬紅大約都有4-5粒唔會一夾就散，豬皮比較細塊都有咬口，豬腸都有大約4件，煮得好腍無乜異味，蘿蔔都有4-5小粒，食落都甜係有少少渣，麵底都煮得幾爽口，係個湯比較油食完成口油同埋無乜味，但$32可以食到咁多款餸而又食得飽既嗱喳麵我諗係第2度都幾難搵到。
1
同場朋友叫左碗大既，就$30，俾大家睇下size既分別。
整體而言味道就一定比唔上d賣得較貴既車仔麵，叫做食得落口，環境方面小店都比較迫d，但真係想平食個車仔麵又的確係一個幾好既選擇，性價比滿分，所以俾好評。
