Lucy Coffee N Food (Closed)

平日一得閒就好鍾意揾下有無d靚靚cafe坐下，食件cake飲杯咖啡，順便遊覽下香港唔同嘅區域，望下街景，觀察下路人，感受唔同嘅風土人情。網上見到有間販售唔少素食嘅cafe，好奇心驅使下，就同朋友決定飯後去食個甜品。店仔細細，外觀好歐式，有我好鍾意嘅大玻璃窗，入到去，位置唔多，但佈置睇得出花咗唔少心思，有少少歐洲古樸嘅感覺，環境好舒服，可以好悠閒地度過下午。見唔少人都點抹茶紫米芝士凍餅，我作為抹茶控，當然都唔執輸啦，抹茶味極濃，蛋糕好順滑，不過個人覺得紫米似乎都係唔夠紅豆咁，同抹茶咁夾，下次試下其他蛋糕先。百爵茶可可朱古力味好濃郁，面嗰層有少少果仁，裝飾靚d，連朱古力飲亦多咗種層次，唔錯，鍾意朱古力野飲嘅你唔好錯過喇。