龍門一番 上海·紫砂燉湯 (Closed)

真係多得山竹唔少，累我家的窗檯嚴重滲水，累及我張床。所以今日去咗荃灣Ikea 買床架和床褥，之後到了同一座商廈之內的龍門一番食午飯。呢度個特色係有好多款茶供客人去揀，我自己揀咗人蔘烏龍，貪佢味道香得來又 “襟” 飲。我哋點咗幾款嘢一齊食: 蒙古手絲雞卷 ($48)、松子黃魚 ($188)、四川擔擔麵 ($52)，同埋榛子小饅頭 ($38)，價錢都合理，食物質素好，一啲都唔覺得貴。蒙古手絲雞卷一份兩條，共切成四件。外皮烤過，部份更烤成金黃色，個樣都幾掂。食落都幾香口，點埋個特製芥末醬一齊食，風味出晒嚟。松子黃魚賣相一流啦，啲松子汁醬淋滿整條黃魚。估計條黃魚都有斤幾重，所以肉都好多。食落外脆內嫩，個汁啲味都都好正。四川擔擔麵花生麻醬佈滿在湯麵之上，香味都聞到。麵質都唔錯，嗦埋啲湯一齊食，好好食。榛子小饅頭個樣好似金磚咁，上面淋咗煉奶和榛子醬，令到本身不太特別的炸饅頭，變成很美味的小甜品。幾款嘢食都幾好食，下次來會食晚餐，要歎下呢度啲紫砂燉湯。