ICONIC H 特色熱狗店 (Closed)

成日好想試呢間特色熱狗小店，佢地賣既非一般熱狗，款款各有特色，樣樣都好想試！諗黎諗去，結果揀左和牛熱狗同大鰻狗，兩個都超好食呀！！！和牛煮到半熟，軟硬適中，混合熱狗腸同烤菠蘿一齊食，簡直係絕配！順帶一提，呢個熱狗有洋蔥，唔食洋蔥既食家記得「走洋蔥」啦！芝士薯條軟綿綿，松露薯條香噴噴！大鰻狗上既鰻魚大條到完全遮蓋左下面既熱狗腸，加上超多鰻魚汁，個熱狗包索晒d鰻魚汁，啱晒怕淡口既我！笑哈哈薯餅好蓉，外脆內軟好好味，仲超飽肚！個雞翼都好惹味，一定要試！再加埋近期新出品「小爆蛋」，一啖咬落去，香滑既蛋汁即刻湧出黎，而且味道調配得非常好，質感同味道都一流，入面仲有煙肉，所有材料都係我鍾意食既，好有驚喜！我一定會再返黎試埋其他熱狗架！