餃腩店 (Closed)

今日又喺旺角搵野食，經過見到呢間餃腩店，見到菜式幾特別，所以就入去試下。我地三個人食，所以叫咗三個唔同嘅菜式試下。首先叫左一個招牌清湯腩幼麵配油麥菜，一個505咖哩金牌牛三寶飯，一個牛筋蝦子撈幼麵。最後因為見到店舖名係餃腩店，相信除左清湯腩之外，餃子都係主打，所以當然要叫來試下啦！我地叫嘅係韮菜豬肉煎餃同黃金粟米豬肉煎餃，仲可以雙拼，一次過試到兩種味道。


首先上嘅係招牌清湯腩幼麵。肉有約有七件，份量唔算好多，因為每件都比較細。先試一啖湯，清甜有牛肉味，完全無味精嘅味道，幾好！:)之後就係試牛腩，佢唔係嗰種淋到用筷子就可以分開肉嘅牛腩，但係幾有肉味，亦算淋嘅。

第二款菜式就係505咖哩金牌牛咖哩飯。估唔到咖哩又幾好食！咖哩味道感覺很正宗，唔係日本嗰種甜咖哩，比較偏向印度嘅，香料重，頗辣，十分惹味！牛肚牛舌都唔錯。

油麥菜無乜特別，正常烚菜。最正嘅一定係呢個牛筯蝦子撈幼麵。蝦子份量足，每啖都食到濃郁嘅蝦子味。牛筯就淋而爽口，ok嘅。

餃子其實幾抵，每隻大約$5 ，仲要大大隻，豬肉嘅份量好多，點埋醋味道十分配合。

三個人埋單$226，如果肚餓就未必食得飽，整體份量偏少，但味道有保證，值得一試！