台灣館 (Closed)

今日收工經過見到呢間台灣餐廳，突然好掛住台灣既野食，就即刻拉埋同事一齊去試下呢間餐廳。第一時間即刻嗌咗個滷肉飯，佢既滷肉係半肥瘦，食落真係好香好好味，同埋啲飯一齊大大啖食好滿足，滷豆腐同蛋都好入味。睇咗陣餐牌先發現，雖然呢度叫台灣館，但都有唔少其他食物，見到圖片既水煮牛肉同辣子雞都好似好吸引，鐘意食辣既我地忍唔住嗌咗嚟食，估唔到有驚喜！水煮牛肉辣同麻都好夠，牛肉軟䭃，份量亦都好足夠；辣子雞都好出色，雞肉好香好惹味，佢斬到細細粒連啲骨都可以食埋，我地都食到停唔到口😂最後由於食得太多辣野，怕會好熱氣，於是都嗌咗兩杯野飲解渴，一杯係胚芽珍珠奶茶，另一杯係洛神花茶，兩杯都幾好飲。呢一餐真係好滿足，雖然呢間餐廳唔單止有台灣菜，亦有其他唔同既野食，食物種類都幾多，質素都幾好，啱晒一啲鐘意一次過食唔同地方菜式既朋友！