成餐飯由頭到尾都好有水準。先講飲品已經好驚喜，芒果沙冰同水蜜桃沙冰果味超濃，口感順滑，有果肉㗎，完全係消暑神器！
泰式奶茶夠香濃，煉奶調味剛剛好，唔會過甜，入口順滑又帶點茶香，飲落真係好滿足。
龍眼冰透心涼，冰沙夠細滑，加埋清甜龍眼，甜而不膩，一路飲有蜜糖香味，啱晒飯後解膩。
大蝦柚子沙律清新開胃，柚子清甜加埋爽口大蝦，整體感覺好清爽，但真係幾辣，如果怕辣嘅人要留意！不過我屋企都食得辣所以ok!
泰式咖喱角外皮香脆，內餡濃郁，有淡淡甜味，好適合做餐前小食。
冬陰功湯絕對係升級得值，酸辣味完美平衡，蝦肉爽口彈牙，加埋香茅、南薑啲香料，層次感十足，份量亦都好足夠，多過四碗。
薑汁芥蘭清爽又夠鑊氣，雖然無乜薑汁味，但芥蘭爽脆，簡單得嚟超好食。
甜酸鳳尾蝦金邊粉酸酸甜甜，蝦又大隻又新鮮，配埋彈牙金邊粉，一啖接一啖停唔到口！
班蘭灸鳳其實係一隻燒雞，賣相一百分，同埋好大份，四個人都食唔晒。
最後，彩虹椰汁糕色彩繽紛，口感煙韌，椰香濃郁，每層味道都好均衡，完美收尾！
今日呢餐絕對係大滿足！成枱菜色樣樣出色，味道層次豐富，材料新鮮，啱晒一家人一齊開心聚餐，最後四個大人捧住個肚走，好滿意！
