湯煲私房火鍋 (Closed)

響港島番工，中午果餐可以話係無啖好食。收工梗係要獎勵番自己。同左媽咪去咗一間叫湯煲嘅精品手工火鍋店。湯底好正，味道精緻。湯底我哋點咗椰子煲雞湯底。湯底有紅棗，椰子肉同啲有材料。而湯底嘅水係椰青水，唔怪得飲落份外清甜，又無味精，好有心思。本來諗住餐廳會將雞件放埋落湯底入面上，點知原來雞件分開另一碟俾我哋。一睇碟雞就知靚雞。仲有隻雞脾添，正。店員解釋，雞係清遠雞，皮薄肉嫩。滾水落6至10分鐘即可。一食，啲雞肉真係好嫩嫩到呢，滑嘟嘟啲皮都真心薄!兩母女食晒成碟雞勁滿足。再點咗碟本地手切肥牛。肥牛份量足料，而且半肥半瘦，油脂甘香又唔會過膩。肉質綿軟又無筋，牛肉味都好重，唔錯。媽咪中意食鱔魚，我就點咗點鱔片。師傅刀法好好，切得薄得黎又夠口感。而且平時多骨嘅鱔片佢都切到避晒啲大骨位。鱔肉雪白而且鮮甜，唔錯。甜品有紫芋糕碗豆糕，清甜滑溜。店員都好溫文有禮，解釋得好詳細，耐心教我地浸幾耐雞件先最好食。見我地想分碟又即刻幫我地攞碟。食物質素高，食材新鮮。連簡單嘅清水都係預備青檸水，好貼心。湯底又清甜滋補，解渴生津，服務滿分，係一間好有Heart嘅餐廳。