餐牌選擇非常多，真係想食咩都有。餐廳剛剛有個晚市任飲優惠，逢星期六至四，只要$98就可以任飲紅白酒、手工氈酒、泰式啤酒、cocktail同泰式特飲，啱晒同朋友慢慢傾。
蒜香軟殼蟹：份量多，軟殼蟹炸到好香，蒜香味濃，食落酥脆，幾好。
飛天通菜 ：通菜炒得夠綠，爽口，好夠鑊氣，食到最尾好辣，幾惹味。
泰式啖啖蟹肉蟹膏炒蛋配薄餅：菜式名無改錯，表層已見到啖啖蟹肉，蟹膏味濃帶鹹香，旁邊有薄餅同青瓜，配青瓜食味道較fresh，配薄餅食就較有層次感，無論邊個食法都係好好食。
泰式香燒雞 (半隻)：燒雞燒得香口，啖啖肉，調味幾好，醃得入味，唔錯。
泰式炒河 (牛)：牛肉多，另外有芥蘭、紅蘿蔔同雞蛋，整體炒得夠燒焦，煙燻味濃，鹹味剛好，係正宗泰國味道。
Sandalwood Sip：自家製cocktail，用左檀香伏特加同白橙皮酒調製，另加上檸檬汁，易入口，有檸檬香味，旁邊有三粒荔枝，味道甜甜地，幾啱女仔飲。
Thai-Beer Mojito：賣相幾好，旁邊有倒立式泰國象啤，慢慢飲，啤酒就慢慢流落去。另外有冧酒、梳打同新鮮青檸汁的味道，加埋幾薄荷葉做裝飾，味道mix埋又幾好飲喎。
