Video
Read full review
2013-11-02
161 views
甚少到廠廈搵食，無咩特別原因。但從飲食雜誌所知，晌政府仲未能夠好活化到啲廠廈，轉數快嘅香港人晌多年前已紛紛進註廠廈搞食肆，更有唔少名廚晌唔同區域插旗，可謂雨後春筍、百花齊放。其實香港鋪租貴喺人所共知嘅事實，鋪租嘅加幅可以用誇張嚟形容，尤其旺區地鋪，根本貴租得唔合理 。不過，隨著食肆「入廠」，相宜嘅租金可令餸菜定價更有競爭力，亦喺吸引客人光顧嘅優勢。觀塘廠廈多，唔少搞入廠食肆嘅熱選區域，今晚走到觀塘工廈林立嘅敬業街，一幢廠廈內嘅「御膳」，有幸嘆一嘆中式私房巧手料理，都喺多得食友邀請，俾個機會小弟掹車邊同往試菜 ！一出電梯就喺御膳，門面裝修得四四正正，相對其他鋪位關上大閘、重門深鎖，唔使擔心會搵錯。入內地方唔大，數張大圓枱，另有一個可容納廿多人嘅廂房，裝修平實，無乜多餘或花巧嘢，又夠乾淨企理，店主解釋租金已慳一大筆，而客人嚟又唔喺食裝修，喺嚐食材真味發師傅手勢，所以裝修再慳一截，菜式定價就可以更抵 。怪唔知得，餐廳隔離仲有個鋪位，架起大魚缸，放有兩張大枱，但就零裝修，適合一大棚人包場食飯，無拘無束，暢飲大食，點玩都得，更正喺無加一之外，又唔收開瓶費，亦無切餅費 ，啱晒搞慶生局啦！
一出電梯就喺御膳，門面裝修得四四正正，相對其他鋪位關上大閘、重門深鎖，唔使擔心會搵錯。入內地方唔大，數張大圓枱，另有一個可容納廿多人嘅廂房，裝修平實，無乜多餘或花巧嘢，又夠乾淨企理，店主解釋租金已慳一大筆，而客人嚟又唔喺食裝修，喺嚐食材真味發師傅手勢，所以裝修再慳一截，菜式定價就可以更抵 。怪唔知得，餐廳隔離仲有個鋪位，架起大魚缸，放有兩張大枱，但就零裝修，適合一大棚人包場食飯，無拘無束，暢飲大食，點玩都得，更正喺無加一之外，又唔收開瓶費，亦無切餅費 ，啱晒搞慶生局啦！
唔想煩，當然揀 4/6/10/12人套餐，但散叫亦有好多選擇，尤其海鮮類。不過，我哋就更加唔需要傷腦筋，因為今晚所試菜式，店方已為我哋準備好晒。
避風塘炒大肉蟹 $399 大肉蟹分多種呎碼：$399 /1斤，$486 /1.5斤，$640/2斤，大可按人數、預算嚟決定，而煮法亦有好多種，如避風塘炒、豆豉涼瓜焗、薑蔥上湯炒、花雕蛋白雞油蒸、麻辣水煮，選擇多多 。是晚試到喺惹味非常嘅避風塘炒大肉蟹，賣相對版，單睇對蟹鉗，已大概知斤両十足，據介紹肉蟹嚟自越南。一上枱香氣四溢，橙紅色嘅炸金蒜舖得滿滿，蒜粒脆口帶微辣，辣度亦可按個人喜好自由選擇，分特辣、大辣、中辣、小辣；至於蟹肉，肉厚味鮮，香辣惹味，尤其蟹鉗，啖啖肉，啖啖滋味，都算得上色香味全 ！
紅袍龍躉 $380 一向都喜歡生炒骨、咕嚕肉、糖醋魚之類酸酸甜甜嘅菜式，所以，依道新菜紅袍龍躉幾對啱小弟胃口。據介紹，龍躉採用沙巴龍躉，每條斤幾左右唔會好大條，肉質會挺滑，再配個士多啤梨汁及芒果粒，伴碟嘅酥炸龍躉骨，旨在表明龍躉真材實料無花假。龍躉肉比一般切得較大塊，肉厚而鮮嫩，而每件都沾滿醬汁，個士多啤梨汁唔太酸，仲有淡淡甜味，而芒果清甜，夾埋一齊確喺唔錯 ，只喺定價上覺得有啲唔便宜啫。
砂鍋什菌龍骨躉豆腐湯 $178廣東人始終都鍾意湯水，什菌湯就更啱晒我，色澤奶白嘅砂鍋什菌龍骨躉豆腐湯既大鍋又多料，飲落清甜，唯可惜唔多夠熱，好快攤凍咗就有少少腥。
西蘭花帶子蝦球 $115 一道常見嘅中菜菜式，似乎無咩特別，但正在用料靚。蝦球大大粒，肉質爽彈，而帶子好有睇頭，肉厚味鮮，配以爽甜嘅西蘭花，大量韮王及冬菇，可謂平凡中嘅不平凡 。
招牌御膳炒飯 $129 以「招牌」為名，應該喺耍家之作，有咩素材同炒，睇睇餐牌就知，包括蝦仁、牛柳粒，鹹蛋蓉、冬菇粒、蔥花，不過牛柳粒改為豬肉粒。估唔到例牌都有咁大碟喎，份量十足，飯粒炒得乾身爽口，食落一啲唔油，由於落得好多料，口感豐富 ，果然不負招牌之名呀！
芒果布甸‧喳咋叫套餐會免費附送糖水，不過，散叫都只不過$7一客。芒果布甸唔錯，幾滑身，有唔少芒果粒 ；相反，喳咋就較大落差，花生未腍透，而西米過腍，黐埋一舊 ，可能一煲過咁煮，相信糖水依家嘢唔喺師傅強項！
餐廳本身逢星期一休息，但大廚想有更多發揮，索性逢星期一晚搞個「私房菜廚師發辦」，食材全權由大廚決定，只限8-12人一枱，收費$500起，實在唔便宜，如想一嚐此神秘飯局，總要付出啲代價 。
雖然唔算樣樣驚喜，但整體水準不俗，據店主講，海鮮喺每天從相熟漁民取貨，講明唔靚唔要，加上大廚本身有廿多年煮中菜經驗，最擅長烹煮海鮮菜式。今晚幾道海鮮菜，食得出用料不賴，烹調功夫紮實，而且定價親民，總好過晌隔離鯉魚門被人劏，未點菜已收一舊錢人頭費啦！
Post
