七點幾嚟到幾乎全店滿坐，門口有人等緊四人位，好彩我哋兩位可以打尖入先，呵呵😝餐牌真係超級多選擇，西式、日式、港式等基本上包羅萬有，仲有甜品、特飲、小食，睇落樣樣都好吸引，叫咩好呢。
⭐簡約晚餐頭盤
叫晚餐附送的頭盤，是日餐湯南瓜湯配餐包，仲有半塊炸魚餅，另外仲有份菜沙律添，呢份簡約頭盤都好豐富喎。
⭐板燒法式羊仔扒配香草蒜蓉汁
朋友揀咗食鐵板羊扒，羊扒有三大塊全部厚切，肉質幾嫩，仲有少少羊騷味，個人覺得味道唔錯😋不過個蒜蓉汁就杰身咗少少，有啲黏口。
⭐紐西蘭肉眼扒配照燒汁
自己就揀得鐵板肉眼扒，塊扒有成十oz超大塊，鬆肉粉就梗係有㗎嘞，但唔算過份，肉嫩香口，個燒汁甜甜地又幾啱味😋
⭐三重芝士焗西蘭花
跟餐加小食有半價優惠，叫咗份芝士焗西蘭花，叫做食返啲菜開心啲嘛😆三重芝士真係幾正，好有芝士味，西蘭花配芝士真係好啱味。
⭐千島海鮮薄餅
朋友話佢要食返啲澱粉質又加咗個薄餅，揀咗千島海鮮口味，上面係滿滿嘅芝士，海鮮有蟹柳、魷魚仔等，啱啱焗起熱辣辣，餅底鬆脆極厚身，飽肚之選😝
⭐仙草奶茶 & ⭐熱華田
跟餐加特飲都有優惠，仙草奶茶幾好飲喎甜度剛好😋朋友嘅華田都ok。
⭐蘋果芝士蛋糕
最後仲叫左件芝士蛋糕自私食😆軟綿綿幾好食吖。
呵呵，全部食晒無浪費，食飽飽好滿足。
