鼎家喜筷 (Closed)

荃灣商場愈開愈多食店，齋係最新呢個海之戀商場已不斷有餐廳進駐。今次嚟到食燒味，一入去令人驚喜係除了有招牌燒味，更有唔同fusion嘅食品項目供應，好似奶蓋茶、心太軟等。平時燒鵝相當出名，而呢間新店更創意地將柑橘融合燒鵝，當然要點碟原隻柑橘燒鵝髀飯試試個實力。用上鮮橙、檸檬、青檸等鮮果去醃製，食落燒鵝肉係相當軟腍鬆化，唔會柴！仲可配以柑橘醬，清新嘅果香幾有新意又特別！除咗燒味飯，撈丁都加入涼拌元素。麻辣蒜香涼拌手撕貴妃雞撈丁係凍食概念，手撕雞份量都唔少，麻辣加蒜香好惹味。跟餐更附送沙律，飲食均衡讚啊！兩者相較我地更愛燒味飯，所以加碼點上一客火焰黑豚腩叉燒。驚喜嘅presentation供食客自己燒叉燒至喜歡嘅焦脆度，油份好足，仲帶點玫瑰露香。飲品方面芝士奶蓋茶相當有新意，幾款奶蓋茶中我地揀咗馬騮搣烏龍個隻，茶味都幾出。另外清爽啲嘅選擇一定係柚子乳酸沙冰，配合燒味都幾夾亦會解膩。最後點埋個甜品作結，朱古力心太軟係呢度都食到啊！內餡部分都好夠流心，配埋重牛乳味嘅雪糕就剛剛好。