醉胡爐 (Moved) New Location

尖沙咀醉胡爐出名「醉湯底」，今次專登去試吓佢哋近期人氣嘅火焰龍蝦海鮮鍋！第一次嚟食，原來呢個火鍋真係好架勢，連個鍋都好古色古香！成個火焰龍蝦海鮮鍋裏面有原隻龍蝦切件、好足料，加上大蜆、蕃茄同埋西芹。首先店員喺我哋面前用猛火將龍蝦炒香然後即刻灒酒，火焰龍蝦即刻喺我哋面前出現，畫面好震撼同埋陣陣海鮮香味撲鼻而來！🤩最後再加入龍蝦高湯，一滾起就可以享受咗碗靚湯先😋淡淡鮮甜濃郁龍蝦味而且仲有蕃茄酸甜味，好開胃！我都飲咗好多碗先開始打邊爐😝 龍蝦肉大大嚿好彈鮮甜好新鮮，大蜆都好肥美！手切頂級安格斯肥牛賣相超靚😍油花分布好均勻所以幾乎入口即溶，質感好滑溜又juicy，而且牛肉味好濃呀！黑松露蟹肉餃比較少見而特別嘅火鍋配料，黑松露味好香蟹肉亦都好鮮甜，同個湯底好夾！不過要注意滾嘅時間，滾太耐好容易會爛咗個皮，食唔到珍貴嘅餡料😝黃金炸魚皮睇相都見到上面布滿晒鹹蛋黃醬，超級邪惡但係極度好味😋仲脆過薯片，充滿鹹香好惹味！鍾意食炸魚皮嘅朋友一定要試吓！最後不得不讚負責照顧我哋嗰台、比較年長嘅店員服務真係好殷勤、好有禮貌，不停幫我哋換骨碟，招呼好周到，呢種服務態度真係好值得嘉許呀！