我見到午餐（C)($37)意大利磨菇漢堡！侍應細心提醒我呢款包係無肉！因為都幾肚餓！我就叫另一款午餐（B)($37)
菠蘿牛肉漢堡！配熱檸茶！我問侍應哥哥個漢堡夠唔夠我同肥髀分享？佢都話夠！（唔會硬銷）等咗大約五分鐘食物就到！賣相已經好鍾意，一塊厚木板（有少少似枮板，或鐵板牛扒
）盛住個漢堡，另有羅馬生菜沙律及薯條！漢堡用把刀拮住！熱辣辣剛做起！漢堡內有生菜、蕃茄、菠蘿、芝士同牛肉！我切咗一半比肥髀！牛肉味雖然唔濃但都有肉汁！菠蘿煎過，甜味出晒，配埋新鮮多汁嘅蕃茄片同生菜同半溶芝士！唔花巧但好味！
羅馬生菜新鮮爽脆！沙律醬不會搶過生菜本身！酸酸地，好味！薯條好大條！粗身！外脆內軟！外面有啲黑椒粒！但唔會辣！肥髀都食到！上菜時已經自動跟埋茄醬！（細心）熱檸茶只係普通茶包沖！ok!餐具用籐籃盛真載！企理！
呢餐都幾驚喜，雖然店舖細細，但食物即叫即做！侍應有禮，夠細心！佢知道我同肥髀分享！會自動比多一隻碟同刀叉，唔使我出聲，窩心！（雖然係好小事，但好多食店都做唔到）可以舒服食一餐！真不錯！
