一起果醬 (Moved) New Location

星期六同男朋友去左西貢行下，搵左呢間出名主打果醬既餐廳食個tea。餐廳同其他西貢小店一樣唔算好大，冷氣略嫌唔太夠，有d焗。因為好快就準備食晚飯，所以我地只係要左一份All day breakfast + 一杯咖啡share。先講All Day Breakfast，其實真係非常普通，有d失望。有炒到老哂既炒蛋，明明話係芝士炒蛋但完全冇芝士味; 煎得唔夠香脆既香腸同煙肉; 幾粒蘑菇，焗蕃茄同茄汁豆，所有野味道都好普通。最值得欣賞既只有本身跟餐係厚多士，但我地加錢轉左既Scone配果醬。Scone焗得幾鬆軟，又夠熱。餐廳主打既果醬可以自己揀，總共有11款，每款味道都幾特別。我地就揀左桂花雪梨，好天然既清甜味，食落好舒服，仲有粒粒雪梨，好好食呀！而飲品係冇得跟餐，要單點。我地要左杯凍Latte，一開始比較苦，問店員拎左d糖水加左就易入口好多。總括黎講，呢度既果醬的確出色，但其他食物就比較普通。