Story Steak & Pasta

元朗嘅美食係接近泛濫，好似試極都仲有好多餐廳未試過！今晚揀左哩間平價西餐。一入到無咩客,有d擔心，但好快就坐滿人。Dinner set 包餐湯 ，蒜蓉包同飲品，仲要免加一，好實惠。

南瓜湯，蘑菇湯

湯可選南瓜湯或蘑菇湯，兩款都足料，飲到一粒粒南瓜同蘑菇。蒜蓉包熱辣辣，都幾香。Menu 推介焗意大利芝士肉醬千層麵。

意大利芝士肉醬千層麵

$98

即叫即整，所以要等一陣。哩個一嚟要即刻食，薯蓉芝士混合埋肉醬係完美嘅組合，襯熱食仲有拉絲嘅效果。鐵板保持到食物嘅温度，所以食到最後仲暖，芝士又唔會一舊舊。

BBQ醬烤原條豬肋骨

$138

另一款係BBQ醬烤原條豬肋骨。好似大家所講，真係好大份，抵食。切開仲係冒煙嘅，好惹味！另外薯條都好吸引，長條幼身，好脆。主角豬肋骨肉質幾軟，所以好易切開。不過略嫌腌得唔夠入味。好喜歡個沙律，並唔係普通咁用麻醬，仲有加入蜜糖芥茉醬，加上蔬菜都新鮮，食落好fresh，又可以減低豬肋骨嘅油膩感。哩間係當你想食平價有質素嘅西餐，第一間會諗起嘅地方。