Athletic Juice & Espresso Bar (Closed)

約左朋友去PMQ睇文字展，估唔到都幾有趣喎，字嘅演變到造型唔了解都唔知咁多。睇完又周圍行下發現左呢間街角小店，主打文青風配上健康飲品，創出一番新風味。牛油果咖啡。以原個牛油果起肉再倒入LATTE，單單造型已經加滿分。咖啡味香滑，飲時溶入左牛油果嘅果脂，味道更豐富淳厚。果肉都無一點浪費，打成蓉後墊在咖啡之下，一來方便固定及造型，二來可以一啖咖啡一啖牛油果肉咁輪住食，以油分令咖啡嘅甘澀味大大減輕。加$18可以配多個酥皮包／曲奇，配成一SET咁慢慢嘆。酥皮包入面嘅係榛子醬，配合咖啡味道一流。另一款鳳凰ＬＡＴＴＥ，入口更順滑。以紅菜頭糖漿做成嘅拉花圖案睇又飲得，入口又無蜜糖咁濃郁，而係淡淡嘅甘香味散發出黎。以味道而言覺得高分過牛油果咖啡。呢度麻雀雖小但五臟俱全，仲提供埋充電線使用，幾貼心。小店雖小但選擇都幾多，店內仲有各款咖啡豆選購，飲啱口味仲可以買返屋企繼續嘆。另一主打鮮製水果飲品及季節限定飲品都好吸引，下次可以再來一嚐滋味。望住林寶堅尼嘆咖啡，都係幾唔錯嘅享受。