8 RECIPES (Closed)

好耐冇嚟東大街，見今日放假，專登過去行下，順便搵食。冇嚟一排，原來街內進駐了不少新餐廳。見到呢間「8 RECIPES」嘅裝潢好有特色，軍藍色門面，再配以一室金啡布置，每一個角落都好適合打卡，午餐嘅地點就一於不作他想。我哋點咗個 8 Recipes 全日早餐 ($108) 同 一客紅肉火龍果蟹肉意粉餐 ($158)。All Day Breakfast 用料相當豐富，有豬肉腸、火腿、牛油粟米、黑松露炒蛋、煙三文魚同炒雜菌，客人可以自選配窩夫或刈包，另外仲會跟一杯熱辣辣嘅蕃茄湯。豬肉腸修長富肉汁，火腿同煙三文魚味道亦唔會過鹹。窩夫好脆口，另外炒蛋同雜菌水準亦唔錯，前者香滑，食落有蛋香，而後者調味亦剛好。意粉餐配有前菜同餐飲，前菜可選凱撒沙律或菠菜胡麻醬沙律，另外亦可以加錢配煙三文魚、秘製醬汁或蕃茄藜麥粟米杯。意粉混入了火龍果汁烹調，粉紅賣相，好吸睛，面頭再綴以食用花，擺盤非常精美。意粉煙韌有彈性，配上絲絲蟹肉，啖啖鮮味。食完仲可以慢慢嘆埋杯餐茶先走，寫意又滿足。