February

Open Now

Now Closed

喺觀塘番工嘅老友話我知，工業區嗰邊有好多質素唔錯嘅餐廳，所以就約咗佢喺觀塘食！佢揀咗位於駿業街一個商業中心入面嘅德國餐廳！德國餐都預咗會食好多肉類，頭盤要叫定個沙律中和一下，Parma ham沙律好大碟，特別之處係除咗有各款沙律菜之外，仲有士多啤梨，咁清新嘅配搭真係very good！德國餐如果冇鹹豬手又點算食咗德國菜？呢個鹹豬手真係非一般！侍應會即場淋上酒，再用火槍即直示範火焰豬手！影相放上社交網站，應該可以有好多「like」！之後侍應會拎番入廚房，切好再拎出嚟比客人享用，伴碟有醒胃酸菜同薯仔沙律。講番主角，燒過嘅皮非常香脆，好惹味，豬手肉好諗身，朋友都話好好食，不過佢平時食得清淡，覺得偏鹹。再嚟嘅都係豬，來自西班牙嘅黑毛豬鞍架，雖然係厚切，不過完全唔鞋口，好有肉味，配蕃茄茸食唔會好滯！黑松露忌廉意大利飯配香烤大啡菇，意大利飯吸晒香菇同白汁味，粒粒飯都香噴噴又有咬口！呢餐飯整體感覺唔錯，睇嚟工業區覓食應該係近年嘅大趨勢！