可能因為係第一批就座，所以都分左張四人枱，唔需要搭枱。我地叫左：蟶子冷盤、海南雞[例]、天天石鍋雞飯、波士龍蝦、鴛鴦菜花、燉湯(花膠白肺、松草花燉雞各一)。
當晚六點已經冇晒想試既酒糟四寶，於是叫左個蟶子冷盤。但上枱同menu有少少圖文不符，結果食晒成餐飯，碟野都好似冇掂過咁。
主打既海南雞雞脾部分算嫩，但係雞胸都係唔夠滑…秘製醬汁唔算特別加分，都係點返蔥油最好。相比之下，石鍋雞飯有驚喜，好味過海南雞！唔會太油膩，雞味又冇被掩蓋。
鴛鴦菜花其實係馬拉盞炒菜，用石鍋上，夠鑊氣之餘又唔會過咸，我地覺得係全晚最好味。
本來都怕食龍蝦會搞到隻手污糟晒，但見佢標榜起晒肉，所以試下波士龍蝦。上枱果然起晒肉，龍蝦上只放左薑蔥，所以淨食唔夠味，但配上新加坡風味辣醬就夠晒野味！
燉湯都算中上質素，但豬肺重有少少味，可未沖洗得夠⋯
埋單$900/2人，咁既價錢重有好多選擇，亦覺得唔需要排晒隊等。
