飲唔成茶，就走咗去LCX入面嘅鈴木咖啡館食lunch。我地被安排坐喺出邊望海嘅窗邊位置。出面泊咗架郵輪，仲有兩位哥哥冒住大雨清潔船身，一路食飯，一路望住呢個畫面都幾得意。
講返d食物，我地叫咗兩個main dishes，另每人加$42多個湯同飲品。兩個main dishes分別係溫泉蛋豚肉飯，同埋帶子大蝦意粉。
個餐湯嘅正確名稱我就唔清楚，不過我估有d菠菜同魷魚條喺裏面，味道都唔錯。
溫泉蛋豚肉飯: 我剩係偷食咗兩塊豚肉，不過d肉配埋d薑汁，幾入味，味道不俗。
帶子大蝦意粉: 碟意粉有一隻帶子同一隻大蝦，我自己就覺得八十幾蚊好似貴咗d，如果有多隻帶子就合理少少。不過個意粉味道唔錯，d 蒜頭令個意粉好香，但又唔會太濃味。隻大蝦都幾好肉，亦燒得幾香。
不過餐廳嘅人手就好似唔係好夠囉，同埋佢地集中喺近門口嘅前半場位置。我地呢d坐喺近海邊嘅後半場顧客，好似無人理咁，叫嘢食都等咗好耐先有人理。
總括嚟講，呢間餐廳嘅食物水準都唔錯，如果夜晚同另一半嚟食飯應該都幾好feel。
