餐廳提供好多唔同嘅菜式，本MENU都好厚，有選擇困難症嘅我地要睇晒成本再去揀食咩，真係需要Ｄ時間。好彩每張檯都會預先準備左一碟蝦片，唔太油膩，我地可以一邊食一邊揀下食咩，差少少清晒成碟！
香脆芝麻豬頸肉
平時食泰國野多數會叫炭燒豬頸肉，今次試下新煮法又唔錯喎！半煎炸嘅豬頸肉加上芝麻，好香口！點醬汁食會降低油膩感！
黃咖喱軟殼蟹
平時好少見到依個配搭，軟殼蟹炸嘅時間剛好，唔好乾身，仲係有JUICY嘅感覺。黃咖喱汁應該係加左D蛋，所以會比較杰身。依個咖喱啱晒唔食得辣嘅我地！
印度薄餅
落單時職員推薦咖喱可以搭配一份薄餅，我地平時都好鐘意食，所以二話不說就叫左！薄餅唔會好油，點上咖喱真係一個完美嘅配搭！
泰式炒金邊粉
金邊粉用蛋包住上碟，旁邊仲跟左青檸，花生碎，糖，辣椒，可以自行調配適合自己嘅口味！仲有好多隻大蝦，金邊粉酸酸甜甜好味道！
泰式咖啡
依排咖啡癮好強，所以都叫左杯泰式咖啡飲，咖啡加上椰奶都幾香！
