The Bayside

Open Now

Now Closed

呢幾日天氣冇咁凍，可以坐喺戶外，有火爐取暖，好舒服。望住靚靚嘅夜景食飯真係好正，加上餐廳播啲舊嘅英文歌，成個感覺好chill! 拍拖食飯或者同朋友仔食飯傾計都好啱！我哋今晚叫咗好多嘢食😂 佢啲嘢食份量都唔細。先叫兩杯sangria啦，一路飲一路食。Tapas有好多選擇。 想食飽啲，set dinner亦都好抵食。Avovado Tartare Verde味道好清新，牛油果他他配芒果同紅菜頭粒粒都幾夾，係一個好醒神開胃嘅tapas。之後食咗炸魷魚圈同Nachos。Nachos好大份好足料，好多芝士，正👍🏻西班牙吐司都非常推介，又薄又脆嘅吐司夾住咸香十足嘅芝士同西班牙火腿，好味道！八爪魚我哋都幾鍾意食，八爪魚切咗片，燒得幾香，不過份量就唔算好多，八爪魚下面嘅薯仔吸晒八爪魚嘅香味👍🏻食完咁多款Tapas其實都飽飽地，淨係食咗一個main course：麵豉醬焗鱈魚。鱈魚肉質鮮嫩香滑，估唔到配麵豉醬都幾好味！最後飽到churros都食唔落😂 下次先食甜品。