利寶閣 (Closed)

次次食放題唔係日本嘢就係韓國嘢，真係冇諗過原來粵菜都會有放題，而且仲要係呢間出名好食嘅餐廳，最緊要仲可以望住個靚海景食，真係冇理由唔試吓啦。一上到去已經見到裝修超靚，好彩佢嘅時間比較早，唔使等位就入得，而且仲安排咗個好好嘅窗邊位俾我哋添。原來呢度除咗粵菜可以任食之外，仲可以叫火鍋任食，一個價錢可以食幾種嘢，真係好抵喎。佢嘅火鍋配料都夠多，仲可以出去自己慢慢揀。嚟呢度其實最主要係想食佢嘅片皮鴨，因為平時出去叫一隻已經幾百蚊，而且如果小人去食嘅話，根本冇可能叫一隻，但係呢度就可以免費任食，我梗係要食返夠本啦。唔好以為佢係任食所以會Hea，佢都真係成隻鴨推出嚟，然後師傅喺我哋面前逐刀切㗎。呢個放題真係咩都有得食，我就唔一一介紹啦。不過呢個蝦真係好值得一讚，本身以為係細細隻嘅蝦，點知佢勁大隻之餘仲要食落好新鮮，啲蝦肉係彈牙嘅，唔會好似平時咁整到梅晒或者唔夠味。呢間餐廳又靚又抵食，聽講佢仲有蟹放題，下次一定要嚟試吓啦。