米線工房 (Closed)

米線店開到成行成市。好多時都會走左大連鎖店食。
去開觀塘廣場附近。發現佢對面有間米線小店。
見到有墨魚頭金錢𦟌呢啲比較唔常見嘅餸揀。
感覺應該小店幾有誠意。就入去支持下。


侍應態度不太友善。冇叫野飲想拎杯水好似唔多想俾。
明白搵食係辛苦嘅。不過做小店服務好重要。
聽到唔少單都落錯餸。
所以米線送上枱時都睇一睇清楚先敢落筷。
叫左蕃茄湯米線。配生菜豬紅牛丸。
牛丸正常。豬紅唔滑不過冇怪味。生菜都靚仔。
個蕃茄湯有驚喜。唔係好假嗰啲蕃茄味。
清得黎蕃茄味又夠。仲見到有好多碎碎嘅蕃茄皮。
同區黎講定價唔算平。不過為左個湯行過都會再黎。