先講湯底，試左4款 - 麻辣（中）、膠原蛋白、椰青水、醉雞。麻辣夠香夠辣不算油膩，膠原蛋白湯堅有起膠質感，當湯飲係無口渴感，淥菜淥牛都入味，好難得！
椰青水好清甜，同牛好夾，但食得多有種偏甜帶膩的感覺。醉雞湯個人覺得比較啱配海鮮（可惜我沒有點海鮮），係4款湯底之中醉雞湯係有點普通，沒有驚喜。
食材方面，2個人食沒有點太多，食材中規中矩，最難忘係准山吸收晒骨膠原湯的味道，好味又自我感覺好養生。
至於人氣食品 咸蛋魚皮，咁邪惡的東西，好難唔好食，只怪咸蛋汁太過流質，如果魚皮上有點咸蛋蓉的話，越邪惡越滋味。
因為可以點半份的關係，感覺蔬菜比其他火鍋地方優惠，1份菜不用$30。至少海鮮及肉類，2人吃會感覺有點貴，4格鍋都要$200，係貴，但勝在食材算新鮮，服務態度一流。
讚一讚服務，待應好有禮貌解釋落單方法，會幫你分魚滑、剝蝦（見隔離枱）、不停添飲等等。
至於環境，只可以講IG相係靚過實境，D枱頂腳唔好坐。
題外話，等位時看到香港食客不禮貌地對待招待員，沒有訂位卻要向招待員投訴自己已等了45分鐘，話趕時間，又話依家訂位係咪即刻有位坐。小姐，你唔一早訂位，仲要比臉色人，又話趕時間唔食啦，但又坐係度唔走，難得個招待員仲可以好聲好氣同你講唔好意思。唉...
