尚座 (Closed)

呢間係片皮鴨關注組推介嘅餐廳，我哋食完係覺得質素唔錯，可惜服務質素真係有待改善！我哋飲完個花膠雞湯，發現有隻昆蟲，叫咗經理幫我哋換過隻碗，雖然佢一句唔好意思或者抱歉嘅說話都冇，但我哋都諗住算啦～之後叫咗幾款甜品糖水share嚟食。叫咗個侍應姐姐拎四隻碗仔俾我哋，佢竟然話：「下？！洗唔洗四隻咁多呀，比三隻你地算啦。」個態度仲要係好唔願意咁。我哋真係一頭霧水，點解拎幾隻碗仔都有問題呢？服務態度咁都得？我哋之後同經理反映，經理都無理我哋，我哋最尾嬲爆爆埋單走人，仲見到經理望左我哋一眼之後走返入去，理都唔諗住理我哋。真係食到一肚氣，就算嘢食有幾好食，性價比有幾高，咁樣嘅服務質素真係好難令人再去食一次或者推介俾人。