Zhing Nong Beijing Sichuan Shanghai Cuisines

呢間野d樓面員工真係不知所謂！呢間野個老闆仲唔換下d員工，唔係遲早都比佢地累到遲早無客0來。

是緣今日係公司係呢間外賣時，打左成5分鐘個電話都唔通，於是打佢外賣單上的另一個電話，呢個電話一打即通，跟住同佢講叫外賣，但佢咩都無講只係講左"2865-1210" 呢個電話號碼，於是我再講叫外賣，佢就話叫外賣唔係呢個電話，要打2865-1210，跟住cut線。咁都算啦，於是再努力地打番個外賣電話，再打5分鐘，終於有個女職員接聽，我就同佢講叫外賣，佢就話等陣先，咁我以為佢要收錢(因為通常外賣電話都是收錢的職員接)，所以等佢一陣，點知係聽筒聽到佢同另一個員工傾計(因為有講有笑)，約成分鐘後佢終於聽電話，佢一拿起個聽筒就同我講話唔記得左，咁都算啦，跟住同佢落單，然後講地址。佢聽到個地址就話："咁遠呀！無咁快喎！" (只不過是港灣道)，於是我問佢要幾耐，佢就話："唔知呀！2點後啦！(當時已是1點45分)，咁我再問佢2點幾到呀？佢就話：唔知喎！我地仲有一個外賣未送。" 嘩！聽完之後真係好嬲，於是我同佢講唔駛喇！跟住收佢線！

大佬呀！人地食飯得一個鐘咋！已經早半個鐘打去啦！都預佢半個鐘送來，都有咁0既對待，真係好嬲。
之前都曾經叫過幾次來都無咁事，都唔知點解而家d職員服務態度真係差左好多，接緊外賣又掛住傾計，又話遠，又話唔知幾點送到！最嬲就係，你仲有幾多外賣未送唔關我事，只不過你地無效率咋！唔可以用來做籍口而唔想送外賣0羅！

其實果度咁多職員，是但求其搵一個去送外賣都多賺幾筆生意啦！d樓面職員成日掛住傾計(之前去堂食d職員成日企係出菜位傾計，叫都唔睬！)，棟晒係度都唔做野！個老闆係度就好d，個個都會扮有野做，走來走去。比人投訴都唔只一次啦！都無改進。又有一次係堂食時都有個男人投訴佢地落錯晒d單，燻魚變排骨，個職員死口都唔認係佢落，但個男人就認得佢，於是同個男人搵個經理同佢講都叫d職員唔好淨係掛住傾計，要做野，做錯又唔認，真係不知所謂！

唔講喇！最後奉勸及希望個老闆炒下d樓面職員，換班真係做野既人！只係d野好食係唔得架，服務都好緊要！唔係真係比呢班職員累死。