1988 (Closed)

下午2點幾揾到呢間食泰菜嘅工廈小店，未入門口前望入店內，都見到有唔少客，但環境睇落似文青cafe😍，有唔少裝飾同綠色植物，感覺幾舒適🥰。入到店內，店員安排我坐近門口嘅4人枱，位置寬敞👍🏻，但係坐對面嘅嗰枱大枱比較嘈吵，所以在我而言，店內氣氛太過好😂，坐喺嗰度一陣已經有啲辛苦🙉。落單時嗌左兩個海南雞油飯，一杯凍奶茶少甜同埋一杯凍朱古力。最值得加分嘅位係落完單嘅女店員好細心問我洗唔洗轉去窗邊嘅枱👍🏻，我二話不說就攬住個袋坐左過去喇😂，真係安靜好多。過左5-10分鐘，野食野飲都陸續上枱喇。先試杯凍奶茶，係Thai tea黎㗎，相信餐廳都有調低甜度，唔係話好甜，但係都幾滑，應該好啱大部分香港人飲😁。凍朱古力就正常啦，冇乜特別。重點嘅海南雞飯份量正常，食曬都一定夠飽。海南雞肉都幾嫩滑，皮肉好易分開，啱曬我呢啲唔食雞皮嘅人，雞件建議點辣醬食，唔好點另外黑色嘅醬(唔知係咩黎😂)。至於油飯嘅味都幾濃幾香口，整體而言，食物野飲質素都唔錯😁。如果去開觀塘嘅朋友，可以去試下佢地嘅海南雞飯同Thai tea🥰。