柚子沙律做前菜，賣相吸引, 柚子夠新鮮又多汁，份量都幾足，仲配咗乾身蝦米同腰果，食落有啲香口煙煙靭靭嘅口感，幾有層次。惹味得嚟唔太辣，開胃！
咖哩牛坑腩配薄餅, 咖哩本身係唔辣，但味其實唔錯，香料味濃又夠椰香，牛腩都算軟淋，不過薄餅就有啲失望😅 可能回熱咗幾次，食落唔夠香脆，口感比較乾實，如果餅可以現煎就perfect。
最後係泰式香辣蝦膏海鮮炒河～ 河粉係闊身薄薄嗰隻，炒得好乾身唔油膩，條粉透亮得嚟又吸晒醬汁味，好特別。海鮮方面都幾豐富，有蝦、魷魚同青口，啲料新鮮彈牙，辣度啱啱好，越食越想食！
生日月份幫襯，仲會送蛋糕。開頭以為係一個脆脆地嘅細蛋糕啦點不知個蛋糕出到嚟呢係好驚喜呀。糯米飯仲整成 **心形**，擺盤用咗三色糯米——藍、白、綠層層疊起，上面放咗芒果雕成嘅玫瑰花，中間仲插咗蠟燭同寫住壽星女名字嘅牌 (雖然佢串錯咗)，成個畫面又夢幻又有誠意 💛
糯米飯暖暖哋、軟糯香甜，配埋冰凍芒果塊一齊食，口感層次好明顯，甜而不膩～ 一啖入嘴有椰香、有果香，味道好和諧。旁邊嘅椰汁滑滑香濃，淋上去更加加分！整體好食又打卡靚，氣氛感十足，朋友話佢好滿意嘅生日甜品之一 🎉💐
其實佢哋嘅餐牌都有兩大本呀，但我哋只得兩條友，呢度真係適合多啲人聚餐,下次我都會再嚟，雖然佢不在市中心，揸車會方便啲嘅。
