篤篤車 (Moved) New Location

今日同媽媽行元朗行到餓，經過呢間鋪，見到係食車仔麵就入左去。入到去睇餐牌先知原來係加左泰國元素既車仔麵，有冬陰公、鱷魚呢啲普通車仔麵檔唔會食到既湯底，終於明白點解叫「篤篤車」。店面唔大，大約座到廿個人，但得一位樓面，不過清潔枱面落單等都好快，落單後10分鐘就有野食。我就簡左小辣冬陰公湯河粉，冬陰公湯好濃味，岩哂中意重口味既人，河粉吸哂個湯，成個麵酸酸辣辣咁好岩而家咁熱既天氣食。而餸就簡左冬菇豆卜響鈴，冬菇係店推薦既，本身炆到好入味，而響鈴同豆卜麵係好吸湯既野，配呢個湯底特別好食。飲品方面叫左咁多款飲品中較為特別既薄荷青檸梳打，薄荷味有啲重，桔多幾下個個青檸會中和返好飲啲，好清新消暑。另外叫左啲小食，有泰酥炸雞翼，泰式鳳爪，春卷同腐乳生菜。在上食物既時候店員好細心咁講清楚邊款食物配咩汁。我特別中意佢地既春卷，配左個汁酸酸地唔會食落好油。媽媽更喜歡個雞翼，細份既得兩隻，如果唔係趕住走會叫多一份而個鳳爪對我黎講有啲辣，但媽媽就好中意基本上食哂成碟！下次黎食一定試下佢個鱷魚湯底。