傳心意 (Closed)

岩岩去完黃金電腦商場購買電子用品，屋企又冇飯開，所以諗住係深水埗附近搵啲快食然後回家。咁岩經過見到有間食新加坡野，走入去望見個menu，賣相好似唔錯，所以決定入去祭下五臟廟。入到去，店內裝修唔錯，感覺舒適唔太迫夾，我比較喜歡店內開放式廚房的設計，望住個廚師煮都係一種樂趣。本來我想點食店的招牌菜海南雞飯，可惜佢地既油飯已經售罄，意欲當堂大減，只好點其他食物。見到食店其中一個主打係蓮藕餅，所以就點了個試試味道如何。等了5分鐘，上菜了，望落去賣相唔錯，雞扒上還有蔥花和辣椒點綴。開餐了，蓮藕餅果然沒令我失望，煎得好趣好香口，口感一流，味道剛剛好又唔太鹹； 雞扒也中規中舉，煎得金黃香趣，份量也不少；唯白飯方面效較遜色，口感像入camp飯堂啲飯既口感。整體而言，餸菜既味道係唔錯，而且頗有特色，唯白飯既口感有待改善，不過以50蚊都唔到既價錢(連飲品)，都已經好抵食。P.S. 值得一提既係食店用既餐具，碗碟同和杯都同一般既餐廳唔同，睇得出黎係店主精心選購過。