輕鬆一下 (Closed)

輕鬆一下呢間餐廳係葵涌廣場其實已經有好多年歷史，我諗成日行葵涌廣場嘅人都一定知道呢間餐廳喺邊，行街行到攰，想搵張凳坐低，不妨考慮嚟呢度，幫襯廿幾蚊小食，「輕鬆一下」。餐廳佔地嘅面積唔細，主力都係賣地道小食為主，客人來得快走得快，基本上都唔使點等位就有得入座叫嘢食。我今日係為咗Hea時間，所以嚟咗呢度食嘢。由於要Hea嘅時間都頗長，有個幾鐘，所以我就叫左碗米線順便醫下肚。叫咗一碗車仔麵---枝竹冬菇米線+腩汁＄34枝竹份量偏少，有d失望冬菇應該無點調味過，食嘅就係冬菇本身嘅菇味，而冬菇嘅size比想像中大，厚度十足，幾好。米線嘅質地，味道亦都比想像中嘅好，我覺得甚至乎係好過譚仔。佢唔係特別滑，但係真係食到有啲米嘅味道，感覺比較天然; 有d可惜嘅係湯底腩汁味道並唔突出。服務方面，本身唔會期望太高。但係希望姐姐收碗嘅時候都會問一聲我哋食完未，或者個碗仲要唔要架？問都唔問就收走咗個碗，我會覺得唔係咁好至於價錢方面，呢一碗兩餸車仔麵要＄34，我覺得就有d貴，＄30以下會比較合理。