呢間餐廳位於粉嶺華明邨，因為要轉車既關係去到華明邨巴士總站，去到已經天都黑晒，又熱又渴又餓咁，不如坐底食左飯先，順便休息下。
1
我一開始以為係普通茶餐廳，諗住快快手所以先揀呢間，坐底之後發覺原來唔簡單，裝修幾有舊式茶餐廳既氣氛，但同時亦冇左舊式餐廳果種老氣同油膩感覺，全部卡位坐得舒服，亦非常乾淨，淨係咁我已經好滿意。
之後原來係用QR Code落單，入面有好多選擇，非常方便，唔洗人等你講又要寫咁麻煩。咁我就揀左煎封黄花魚，地道霸王雞，一個家常小菜二人餐，有湯，有白飯，揀多兩個餸有椒鹽豬扒同欖菜肉崧四季豆，最後緊係唔少得兩杯凍檸茶啦。
呢頭落完單，已經上左白飯同湯，好快手。湯飲左兩啖就上左煎封黄花魚同地道霸王雞，估唔到咁快。
煎封黄花魚，皮脆肉軟，估唔到有呢個水準，加埋個豉油真係好出色，食到魚既鮮味。
而霸王雞亦唔差，做到皮爽肉嫩，唔會鞋，個蔥油先最香，淋左喺面頭香噴噴，真係追住食。
之後上埋椒鹽豬扒同欖菜肉崧四季豆，椒鹽豬扒夠鑊氣，夠晒香口，炸到外脆內軟，唔乾身，送飯就一流。
而欖菜肉崧四季豆亦炒得好香，四季豆同肉崧味道好夾，唔會太油，非常美味。
呢問餐廳算有驚喜，幾個簡單小菜有住家飯味道，有機會可以再食過。
