Akoya

上到3樓，門口系閂住，好神秘甘，初初仲以為有活動，要摸門釘，好彩吾系！冇訂位之下，就要等一等員工做埋手頭上既野先理你。因為嗰日都幾夜去，所以得反吧枱位。睇吾到成個場既空間，不過就覺得整體上多人既時候有少少嘈。之後嗌野食，員工都好積極，只系一開始可能我入場時佢地都忙緊先冇甘快理我地。

雞湯卡邦尼拌鳥冬

$98

卡邦尼不嬲系我首選，所以今次都系睇準尼道菜而黎。佢真系好多芝士，好creamy！但！我竟然覺得佢太漏了🥹 睇佢菜名見系雞湯卡邦尼，以為系再水潤D既組合，系尼道菜食吾到雞湯味，只系卡邦尼好重嘅烏冬。

超濃厚雞湯烏冬

$98

本來對尼個冇乜期望，諗住只系普通烏冬。一上枱，好有拉麵既感覺，佢尼碗雞湯好出色，好濃郁！所有既配搭得一個字，正！👍🏻 唯一既系，我都分吾到佢烏冬系偏軟定偏硬，因為我食落系好彈牙，但又淋淋地既感覺。當然，我冇preference，所以對我尼講系好食👍🏻

海膽汁燒蠔

$118

小食黎講，講真我睇餐牌，睇落都吾系好多野嗌得落，有D系內臟派，我吾食；有D就...我覺得吾太抵（例如串燒$36一串，不過我吾知佢有幾多舊既）。所以我就揀左唯一最吸引我既蠔💕本身我吾系一個十級中意海膽既人，但尼個海膽汁真系尼餐既精髓，我連食烏冬都不一啖海膽汁一齊食，真系好好味👍🏻👍🏻 個蠔外圍系脆脆地，內裏就好軟熟，$118有4舊，抵啦！

自家製雞蛋布甸

$38

最後本來都已經好飽，但又好想試埋佢個甜品，因為睇落好吸引。試左佢傳統D既雞蛋布甸，應該系我食過最好食既🍮佢既軟硬程度好適中，平時食過既都淋左D。而且佢既雞蛋味好濃，真系好好味👍🏻


另外，我星期三去，佢做緊生啤買一送一優惠，印象中樓下既廣告牌好似印左每個星期都有優惠。嗌左Sapporo Draft Beer 400ml，變相$58有兩杯，好抵。可惜我吾飲酒，問過可吾可以轉其他低價飲品，但吾可以。