星鰻魚配薯蓉-$150
星鰻好香口，鰻魚本身已經唔腥，配上醬油去燒，醬汁啱啱好，唔會遮蓋星鰻本身既味，配菜有新鮮菠蘿都蕃茄。菠蘿同蕃茄都好新鮮，對於鍾意食配菜既我就非常喜歡。主食就啱啱好夠飽。我之後再叫左兩個小食。
香蒜蜜糖雞翼棒棒（跟餐$70原價90）
呢個真係超級好食，雞翼係單骨雞翼，食落去好方便，唔會食到成手都係。雞翼好滑溜，食落有種淡淡既蒜味亦唔會太濃，表面加咗蜜糖令件事提升左
香脆得黎又有種清新，食落又唔會太熱氣，呢個真係超級推介。煙三文魚牛油果米紙卷-$90
因為兩個人所以就叫多個小食，牛油果好夠熟，所以食落口好香牛油果味同夠淋，最重要係好多牛油果係入邊，包住煙三文魚令到個米紙卷有口感之餘同時又有鹹味，食落唔會太單調，食完呢個比較飽，如果唔夠飽可以揀呢個食
鳳凰單欉-柚花香 （跟餐-$58）
店員好細心介紹茶葉，點樣沖，沖幾耐都會教埋您，飲落好舒服，食完野飲淡茶，同朋友吹下水，出面飲啲台式飲品都要3-40蚊杯，所以又覺得幾抵，可以自己沖幾泡，消滯解渴。
兩個人最尾食咗$368，無加一，除翻開都係每人$184，唔敢講算唔算抵，但我覺得食物質數絕對夠誠意。出去食飯好多時都唔好食又貴，呢度環境舒適，員工又好。用心煮嘅食物係食得出架，餐廳用心經營都絕對感受到，呢啲就係茶好飲，嘢好味。加油
題外話：
除咗廚房同鋪面環境之外，我成日會睇一間餐廳個廁所乾唔乾淨，決定佢有幾衛生，呢度絕對夠乾淨，同埋幾細心，有抹手紙同滴露鹼液，所以都幾加分。
