萬發海鮮菜館

Open Now

Now Closed

相信喺深水埗長大嘅人，冇咩邊個會唔識萬發。尤其是係佢個薯仔牛柳粒，簡直就係招牌菜，唔少人係專登過嚟食呢道餸㗎！同兩個朋友買嘢買都唔知時間，但係朋友又要趕住返屋企，所以決定去買外賣返去一齊食。靈機一捉，不如去食萬法啦！其實私心係好掛住呢味餸，我哋一行三人就走咗去買外賣啦。得三個人，都唔可以叫太多嘢食，所以我第一個舉手就係叫薯仔牛柳粒！其實以前不嬲都係食開石硤尾街嗰邊嗰間，但係佢又搬咗，所以就過嚟呢邊食喇。都有少少擔心佢嘅鑊氣冇嗰邊咁正，但係原來我嘅擔心係多餘嘅！外賣返到屋企，啲薯仔仲有少少脆，係呀，佢啲薯仔係外脆內軟㗎！可惜嘅係牛柳粒有少少過火囉⋯⋯之後，朋友想食雞，通常嚟呢度唔係食西檸雞就係風沙雞，咁就梗係叫啲喺屋企唔會成日煮嘅嘢啦！明明記得細個食萬發嘅時候，佢係用炸蒜㗎，但係而家變咗係炸麵粉，當然唔會好似以前咁惹味啦！但係有到好處，返到屋企食嘅時候都仲係脆卜卜，以前炸蒜返到去可能都淋晒囉。啲雞皮依然係脆嘅，雞肉都好嫩，推介之一！最後一道菜，就係魚香茄子，呢個餸就正正常常冇咩特別，都幾好味嘅！不過用嚟送飯就真係一流！