揀得啱車仔麵 (Closed)

車仔麵呢款平民美食對於香港人嚟講應該唔會陌生，但食得過又捱得住香港貴租嘅車仔麵真係買少見少，今日就嚟到最近幾多人介紹嘅揀得啱會一會佢。酸辣木耳絲$15見到平平哋就忍唔住叫左碟嚟試吓，木耳爽脆，仲撈埋我最愛嘅芫荽😍辣度適中，十分開胃嘅一道小食。千杯不醉雞翼$22/3隻 $28/5隻雞翼脹卜卜啖啖肉，花雕味唔會太重手，淡淡滲出剛剛好，價格亦好親民。揀得啱Combo麵餐$68由於有選擇困難，唔想諗嘅情況下就揀咗最貴嘅Combo麵餐😂醬汁都有好幾款可以選擇，我今次揀嘅咖哩汁香辣得來幾夠勁度，絕對係成碗麵嘅靈魂，toppings普遍都做得唔錯，最鐘意佢地嘅牛肋條同豬腸，牛肋條牛味好濃，燜到勁腍，豬腸軟綿綿又夠甘香，另外當然唔少得香港人最愛嘅陳皮魚蛋，同車仔麵簡直係絕配。