午餐主要都係食返套餐，呢度都幾fusion ，好似咩都有啲咁，日式韓式中式西式乜都有啲！今日天氣凍冰冰，所以我就揀咗要大醬牛肉豆腐湯，飲落去暖下個胃都好呀！
我諗佢係即叫即整嘅，因為都等左一陣，朋友個叉燒煎蛋飯食完一半我個湯先至嚟。嚟到個份量都唔細，個湯入邊除咗有豆腐同埋牛肉之外，仲有一啲蔬菜嘅！有啲翠玉瓜、蘿蔔、薯仔同埋冬菇等等。講真，仲有咁大碗飯就真係食唔晒嘅。味道當然唔會話去到好韓國風味啦，但係如果冬天來講，想食啲熱辣辣嘅嘢都幾好味嘅！
除咗個湯同飯之外，佢仲有少少半菜，有啲泡菜啊牛蒡啊同埋蘿蔔絲咁，送下飯都唔錯吖！
